من دون خلايق الله البتحلم بى العشق
انا جد هويتك دون وعى
احرمته من داخل قليبك شان اجيك
او لى مقامك ارتقى
هرولته بين عينيك كتير
لو يوم تحس بى ريدى ليك كملته اشواط السعى
ورميت وراى احلامى والضل والحراز
وجمعته جمرات العشق
ورميته فى اعلى القمم
بإسمك وبإسم الريده والقلب الحزين
ونعلته عمرى الكان بلاك
ورجمته شيطان الظروف
الخلا قلبى وراك شقى
انا عارفه انو الحب عذاب
والجنه رزق المتقى
لكني حجيتك كتير
وما بين طوافى مع الهدي
انا كم سقيتك دون حساب
من زمزم الروح النقى
ولبيك بى كل الحواس
لبيك عمرى وهبتو ليك بلا قياس
لبيك حقق منيتى
وقرّبنى بس وقتين يراودك يوم نعاس
لبيك ما احلى العشق
وقتين تطوف فى كعبة الهوى دون مساس
هى الدنيا نفسها ذاتا فيك
والواطه ضاماك باتزان باقيلا محور ارتكاز
لبيك بارك خطوتى واديني من قوتك حماس
اهواك بيو باقى العمر وعميري بيك يصبح نقي
لبيك عارفه الناس عليك ولهانه
لكن متلى حاج ما بتقلى
تنزيل بابكر المبارك ..